Nov. 22,2013-“Baken tako et safe isnan mismo ay ili tako” kanan Vicky Wanget Freancisco isnan panikitongtong ken siya maipanggep isnan nangiholdan nan popolis ya sosoldado isnan anak na, ay si Mark Ian Wanget, nan besat na ay si Ernesto Fransisco Jr. Ya pito pay ay residente id Northern Sagada.
Segun isken Vicky Wanget Fransisco, Pinarebwat na da Mark Ian ken Ernesto ay umey men-awit isnan kaiw dadapay ilan nan kinarbon ay uling id Lesnadan, Palidan, Sagada isdin November 13 isnan oras di alas kwatro ymedya isnan wakgat.
Expectaren Vicky ay sumaa da isnan alas siyete ay mangan ta sadat umey maki-oskila, ngem umalas siyete emedia dapay maid da paylaeng.
Gapu tay maid da isnan maexpectar ay oras, inmey inilan Vicky daida isnan oras di alassiyete emedia, danat datngan daida ay wada isnan iman nan popolis ya sosoldado.
Insaan Vicky nan anak nay a nan innudi na isnan oras di alas otso emedia.
Segun isnan istoryan Vicky, isnan nangalaan nan popolis ya sosoldado anak ya besat na, inala da nan cellphone da ya nan gamig da, dadat inpakaan nan butas da, dadapay imbistigalen daida, sadapay palukbuben daida is agarup esa ay oras. Nan kakailiyan da ay kadwa da et wada nan tinutokan da is paltog habang maim-imbestigar.
Kanana pay, manipud isdi et kanega nakikibtot paylang nan 2 ay ongong-a, no mamingsan pay et tulala da. No kakali daida no mamingsan et kaneg maid dinnge da, awni ta gen-am daida sadat men aa.
Kanan nan esa ay umili id North, Ya, ay kanan tako et mo popolis ya ssoldado et daida nan mangprotectar isnan sibilyan ya, ay ngan daida et obpay nan mangkibtot ya mangpaegyat ken datako.(Igon Doco)